HİKMET-73 < xml="true" ns="urn:schemas-microsoft-com:office:office" prefix="o" namespace="">
Neçe yıllık mehribânım cân ediler dostlarım
Bu vücudum şehrini fâni kıladur dostlarım
Bu kafesni tutisi pervâz kıladur uçgeli
Bir karanğu şulesiz yerge baradur dostlarım
Ey meni yârânlarım himmet tutung imânıma
Düşmanım imânıma zahmet beredür dostlarım
Uşbu cân bizler birle bir neçe yıllar bar edi
Hak Teâlâ hükmi birle azm etedür dostlarım
Bu mening azâlarım cânım birle şâdmân edi
Cân çıkarğa külli azâm titreşedür dostlarım
Emr-i Hakk'a barça halk-ı âlemin boldı rızâ
Ol hakikat bendeler dâim rızâdur dostlarım
Kul Hâce Ahmed tutisi pervâz etedür uçgeli
Neylesin Miskin hükm-i Hudâdur dostlarım
HİKMET-74
Ömrüm zayi' gaflet birle yel dek ötti
Hasretingde közdin yaşım kan dek ketti
Bildim dostlar bu aklım emdi yetti
Seherlerde kobub taat kılgum kelür
Seherlerde Kur'an okub senâ kılsam
Hazretingge kol kötarıb duâ kılsam
Zari kılıb bu canımnı feda kılsam
Seherlerde kobub taat kılgum kelür
Hırs u heva nefs yolunı koymak kerek
Mansur yanglığ dar başığa minmek kerek
Nesimi dek can aççığın çekmek kerek
Seherlerde kopub taat kılgum kelür
"Fezküruni ezkürkum" ayetidin
İman boldı Hak Te'ala taatıdın
Keçmek kerek uşbu nefsning rahatıdın
Seherlerde kobub taat kılgum kelür
Zahidlerge zühd ü amel takva kerek
Riyâzetlik aşıklarga fetva kerek
Ul tarikat er bolganga da'va kerek
Seherlerde kobub taat kılgum kelür
Arıtur dil zengarını "Hû-Hû" yadı
Aşıklarnı keçe kündüz "Hu" muradı
"Hu-Hu" teyu can bergeysen Kul Ahmedi
Seherlerde kobub taat kılgum kelür
HİKMET-75
Hiç bilmedim neçük keçti ömrüm mening
Sorar bolsa men kul anda ne kılğaymen?
Netek bolğay yolğa salsang men acizni
Sorar bolsa men kul anda ne kılğaymen?
Yoldın çıkıp azğanımnı bilmedim men
Hak sözini kulagımğa almadım men
Bu dünyâdın keterimni bilmedim men
Sorar bolsa men kul anda ne kılğaymen?
Ötkenlerdin ibret alıp yolğa kirmey
Nevha feryad aytıp anda ortab yanmay
Keçe kündüz yürümişmen özni bilmey
Sorar bolsa men kul anda ne kılğaymen?
Cânıng çıkıp tening yatur tar lahedde
Sorğuvçılar kelip sorsa ol hâletde
Akar yaşım keter huşum ol vakitde
Sorar bolsa men kul anda ne kılğaymen?
Gafillikde yürüdin sen it dek kezip
Tening yatur tar lahidde asru şişip
İş kılmadıng sen Tengrige kögsin teşip
Sorar bolsa men kul anda ne kılğaymen?
Kul Hâce Ahmed bu dünyâda tevbe kılğıl
Tevbe kılıb yol başığa barıp turğıl
Hâs kullar dek azukungnı alıp yürgil
Sorar bolsa men kul anda ne kılğaymen?
HİKMET-76
Her kim kılsa tarikatnı da'vâsını
Evvel kadem şeriatga koymak kerek
Şeriatnıng işlerini edâ kılıb
Andın songra bu da'vânı kılmak kerek
Şeriatsız dem urmaslar tarikatda
Tarikatsız dem urmaslar hakikatda
Uşbu yollar yeri bilinür şeriatda
Cümlesini şeriatdın sormak kerek
Andın songra bir er kerek iradetliğ
Bolmış bolsa ol bir erdin icazetliğ
Şeriatda rast muvafık kerametliğ
Oşal erning etegini tutmak kerek
Kim bilmeyin bu yollarnı şeyhmen dese
Kerametdin vilayetge haber berse
Batıl erür eger ruhül-emin erse
Özin andağ batıllardın saçmak kerek
İradetsiz icâzetsiz mürşid bolmas
Tarikatnıng yollarını hergiz bilmes
Mübtedidür iradetge layık ermes
Andağlardın yırağ-yırağ kaçmak kerek
İrâdetni bergil ehl-i icazetge
Kâim bolgıl tüni ü küni riyazetge
Sanab anı kulluğunu ibadetge
Kulluğıda belni bağlab turmak kerek
Andın songra mücahede tonın kiyib
Riyazetni botasıda erib akıb
Menmenlikdin ötüb özini sâf kılıb
İzzet rahatın satıb hârlık almak kerek
Uşbu turur erenlerni kılğanları
Taliblerge bilsün deban ayğanları
Rastdur bu söz bilgil yoktur yalğanları
Can kulağı birle munı bilmek kerek
Sıdkı birle her kim kabul kılsa munı
İ'tikadı birle bolsa tünü küni
Yadı birle meşğul bolsa yeldâ tüni
Erenlerdin himmet yarı kılmak kerek
İradetsiz uşbu yolğa kirmediler
İnâbetsiz yolğa kadem koymadılar
İcâzetsiz yarım nefes urmadılar
Mürid bolğan bu sıfatlığ bolmak kerek
Her kim kirse uşbu yolğa belin bağlab
Kul Hace Ahmed kerek özni hadim eyleb
Niyetini Hüdayığa dürüst eyleb
Teveccühni azizlerge kılmak kerek
HİKMET-77
Şeriatnı şeraitin bilgen aşık
Tarikatnı makamını bilür dostlar
Tarikatnı işlerini eda kılıb
Hakikatnı deryasığa batar dostlar
Didârını körüb bolmas tün-kün uyub
Pak ışkını kolga almay bolmas yürüb
Hakikatnı deryasını hatarı köb
Hiç uhlamay didarını körer dostlar
Eya aşık bu dünyada mihnet targıl
Tartkan cevr u cefalarını rahat bilgil
"Hû" sohbetin kurgan yerge özüng urgıl
Urgan aşık muradıga yeter dostlar
Bu yollarnı gazâsudur kaygu mihnet
Mihnet tartıb cefâ çekken körer rahat
Seherlerde zârı kılgan huş saadet
'Hû-Hû" teyu bu dünyadın öter dostlar
Çın dil birle yığlaganlar körgey lika
Sübhan İgem didârını kılgay ata
Kılavuzsuz yolga kirmeng aynı hata
Yolga kirgen menzillerdin ozar dostlar
Vaderiğa ötti ömrüm bilmey kaldım
Bu dünyanı esbabını kolga aldım
Dünya izleb din işini artka saldım
Bilelmesmen halim neçük bolar dostlar
Muhabbetni şarabıdın tatmaganlar
Bayezid dek herkun özin satmaganlar
Bu dünyanı izzetidin ötmegenler
Hayvan erür belki andın beter dostlar
Aşık bolsang ışk yolıga koygıl kadem
Dünya ukbin talak koygıl misl-i Edhem
Akil erseng dünya üçün yemegil gam
Kıyamet kün cezaların berer dostlar
Sır şarabın içgen aşık özin bilmes
Bu dünyanı izzetlerin közge ilmes
Yüzming dânâ nâsih bolsa pendin almas
Vaşuka dep özin bilmey yürer dostlar
Ruz-ı elest Hüda özi nida kılgan
"Kalu bela" deban ruhlar cevab bergen
Hazret taba ruhlar uçub karşu kelgen
Andağ aşık Hak cemalin körer dostlar
Kul Hace Ahmed aşık bolsang dünya koygıl
Ahiretni azabıdın kaygu yegil
Erenlerni kılganların hem sen kılgıl
Hizmet kılgan âhir murad tapar dostlar
HİKMET-78
Keling dostlar Allah yâdın daim aytıng
Allah yâdı köngül mülkin açar dostlar
Estağfir u istiğfarnı tınmay aytıng
Şeytan la'in ten mülkidin kaçar dostlar
Şeytan la'in sizge düşman hazır bolung
Keçe Allah kündüz Allah aytıb ölüng
Tar lahedge kirer vaktda nurga tolung
Melaikler Allah nurın saçar dostlar
Allah nurı kabr içini ruşen kılgay
Melaikler tigreside ravzen koygay
Mü'min bende körüb anı hayran kalgay
Bu alemni ruşeniden keçer dostlar
Barça ervah yığlıb kelgey mübarekke
Halâyıklar meşgul bolğay tebarekke
Dua kılıb yangandın song kalur yekke
Cümle ervah süyünib bir bir kuçar dostlar
Yetti kadem koygandın song Münker-Nekir
Heybet birle kirib kelgey kılıb kahır
İki közi ot dek yanıp okrab turır
Nurın körüb ta'zim kılıb kuçar dostlar
Münker-Nekir sormay çıkıb nâle kılgay
Köz yaşını akkuzuban jâle kılgay
Hak yâdını aytıb özin vâle kılgay
Pervaz kılıb hava sarı uçar dostlar
Nida kelgey İlahımdın ne yığladıng
Has kulumdın kabr içinde ne tıngladıng
Ey bi-edeb kulak salıb ne angladıng
Münker-Nekir ong u solga kaçar dostlar
Yürse tursa,yatsa kobsa meni yâdım
Hatt-ı berat kolga algan ol azadım
Andağ kulnı saydıdurmen ol seyyadım
Kılmış aytmış günahlardın keçer dostlar
Günahların Hak bağışlab nazar kılgay
Ongda solda yatkanları şâkir bolğay
Andın songra barça ervah hazır bolğay
Kabristanga Hak rahmetin saçar dostlar
Bihamdillah yahşı keldi biz kutulduk
Kabr içinde her azabdın fariğ bolduk
Neçe yıllar mürde erdik bes tirildük
Dua kılıb Hakk'a elkin açar dostlar
Münker-Nekir yığlab aytur Sen bilürsen
Zatıng uluğ her ne kılsang Sen kılursan
Lutf eyleseng yolsızlarga yol berürsen
Secde eyleb şâkir tilin açar dostlar
Lailahe illallah'ga şeydâ bolgan
Didâr üçün bu alemde resvâ bolgan
Dünya koyub ahıretni sevda kılgan
Havz-ı kevser şarabıdın içer dostlar
Ruz-ı ezel takdir kılsa Hak cemali
Yüzming şeytan kasd eylese yok zevali
Kündin künge ziyad bolğay kal ü hali
Dânâ bolub Hak yolların açar dostlar
Muhabbetni meydanıda cevlan kılgan
Hakikatnı deryasıdın gevher algan
Marifetni meta'ını içke salgan
Yürse tursa dürr ü gevher saçar dostlar
Aşık uldur Hakk'a canın kurban kılsa
Zikrin aytıb çarzarb urub seher tursa
Erenlerdin feyz ü fütuh tola alsa
Sultan bolub dürr ü gevher saçar dostlar
Hakk Te'ala buyın algan munda turmas
Da'va kılıb işanlıknı lafın urmas
Kayda barsa fakir-miskin dükan kurmas
Garib bolub veyranege köçer dostlar
Kul Hace Ahmed nefsdin uluğ bela bolmas
Yer ü kökdin to'ma berseng hergiz toymas
Tufrak olub yerde yatsang kafir bolmas
Nefsi ölgen hur u gılman kuçar dostlar
HİKMET-79
Yaratkan Bir ü Bar'ım yolın izleb
Şeytan la'in yollarıdın kaytıng dostlar
İhlas birle muhabbetni camın içip
Can u dilde Hayy zikrini aytıng dostlar
Hayy zikrini aytıb içgen cam-ı şarap
Yol üstide aziz başı misli turab
Allah içün hali harab bağrı kebab
Can u dilde Hayy zikrini aytıng dostlar
Astanege başım koyup zari kılsam
Halka kurup kim zikr aytsa yarı bersem
Zikrin aytıb ol suhbetdin dürler tersem
Can u dilde Hayy zikrini aytıng dostlar
Amel kılmay alim ilmin basıp yürgey
Ölüp barsa tar lahedde canı küygey
Allah, Resul dining kim dep haybet kılgay
Can u dilde Hayy zikıini aytıng dostlar
Münker-Nekir "Men rabbük" dep seval kılgay
Kal ilmidin bir nuktası kâr kılmagay
Va hasreta amelsizler neçük kılgay
Can u dilde Hayy zikrini aytıng dostlar
Allah degen kend u esel peyda kıldı
Ahiretde Allah birle sevda kıldı.
Amel kılgan çın alimni dânâ kıldı.
Can u dilde Hayy zikrini aytıng dostlar
Kalıng çırağ haling pilte yağı yaşıng
Neçe aytsam behre almas köngli taşıng
Yol üstide tufrak bolsun aziz başıng
Can u dilde Hayy zikrini aytıng dostlar
Essiz alim amel kılmay yolda kalur
Okup okmay dünya malın kolga alur
Menmenlikdin essiz ömrün zayi kılur
Can u dilde hayy zikrini aytıng dostlar
Zahir buzub batın tüze alim bolsang
Ruz-ı mahşer kolung tutgay tangla barsang
Va veyleta nedamet dep yolda kalsang
Can u dilde Hayy zikrini aytıng dostlar
Alim uldur namaz okub ta'at kılsa
Hak'dın korkub ahiretni gamın yese
Kur'an okub Hak'dın korkub zar ingrese
Can u dilde Hayy zikrini aytıng dostlar
Andağ alim ikki közi giryan bolur
Seherleri erte kopub nâlân kılur
Hak yolıda küyüp yanıb biryan bolur
Can u dilde Hayy zikrini aytıng dostlar
Hârlık tartgıl kafr nefsing başı katsun
Daim müdam bu dünyadın yığlab ötsün
Tufrak bolgıl alem seni basıb ötsün
Can u dilde Hayy zikrini aytıng dostlar
Harlık tartıb Hak Mustafa Ümmet dedi
Asi cafi ümmetlerin gamın yedi
Anıng üçün ümmetleri kuvvet aldı
Can u dilde Hayy zikrini aytıng dostlar
Ümmet üçün bağrıda yok zerre bütün
Ümmet dese dimağıdın çıker tütün
Hak Te'ala kılgay mu dep bizni otun
Can u dilde Hayy zikrini aytıng dostlar
Kul Hace Ahmed alay deseng Hak'dın uluş
Bayezid dek nefsing birle tün kün uruş
Ey bihaber ümmet erseng buldur reviş
Can u dilde Hayy zikrini aytıng dostlar
HİKMET-80
Eyâ dostlar beyân eyley Hak Resul'dın
Ümmet bolsang iştib dürud aytıng dostlar
Ol "rahmeten li'l-âlemin" cüzü küldin
Ümmet bolsang iştib dürud aytıng dostlar
Hudâvendim atâ kıldı anga Mirâc
Rahmet bahrı tolup taşıp urdı mevvâc
Koydı anı başı üzre la-emrük tâc
Çın ümmetsen iştib dürud aytıng dostlar
Evvel Cibril alıp keldi anga burâk
Burâk minip kıldı Hazret ming tumturâk
Burâk uçup pervâz kıldı hind el-Irâk
Çın ümmetsen iştib dürud aytıng dostlar
Aksâ barıp tüşti körüng anda Server
Yığıldılar cümle rûhlar ol Peygamber
Mübârek bâd kıldı rûhlar anda yekser
Çın ümmetsen iştib dürûd aytıng dostlar
Cibril alıp ol Hazretni kıldı pervâz
Ol Sidretü'l-müntehâ'ğa yettiler bâz
Mustafâ’nı Cibril kıldı hub ser-efrâz
Çın ümmetsen iştib dürûd aytıng dostlar
Makâmıdın ötelmeyin Cibril kaldı
Cılavını ol Mikâil kelip aldı
Ahir demde ol Mikâil harıp kaldı
Çın ümmetsen iştib dürûd aytıng dostlar
Ol İsrâfil anı alıp uçtu cinân
Ol makâmda Resul kıldı aceb cevlân
Ol hem kaldı makâmıda kılıp efğan
Çın ümmetsen iştib dürud aytıng dostlar
Arşka karab kadem koydı Resulullâh
Naleynini salay dedi Hak Mustafa
Nidâ keldi naleyn birle sen koyğıl ha
Çın ümmetsen iştib dürûd aytıng dostlar
Hak sarıdın nidâ keldi "Erini meni"
"Ey Habibim manga karib kelgil beri
Mahrem kılay hâs sırrımğa İmdi seni..."
Çın ümmetsen iştib dürûd aytıng dostlar
Hakk'a karap koydı kadem Resûlullâh
Hakk'dın özge hiç kim yoktur anda hemrâh
Mundağ makâm hiç kimge yok vallâh bi'llâh
Çın ümmetsen iştib dürûd aytıng dostlar
Çın ümmetsen bu sözlerni hüb bilip al
Uşbu sözler hâs ümmetke mânend-i bal